فى اى مجال من مجالات الابداع، بنحب اننا نعرف رأى الناس فى شغلنا، و طبعا النفس تميل لما هو جميل، فبنفرح جدا لما بنلاقى شغلنا عجب الناس، وساعتها بنهتم اوى برأيهم، ولكن لو رأيهم ماكنش على هوانا بنفضل نقول حاجات زى "انا بعمل فن، والفن مش بالضرورة يعجب كل الناس" .. "انا بعمل الحاجة الى بحبها و مش مهم رأى حد" .. او حاجة أقل قسوة شوية زى "لولا اختلاف الآراء لبارت السلع".. و خلينا معترفين ان آراء المشاهدين بتأثر علينا سلبا و إيجابا، باختلاف الدرجات، و ده ممكن يبقى له تأثير سلبي جدا عليك و على شغلك الجى، او تأثير ايجابي..فالموضوع ده هناقش امتى تسمع للناس وامتى لأ.
قبل أى حاجة خلينا نقسم المتلقى الى ٤ فئات:
- (متلقى عادى) مشاهد عادى جدا بسيط يهمه انه يتبسط بالفيلم الى بيتفرج عليه وخلاص
- (متلقى متطور) مشاهد واعى و فاهم
- (متلقى زميل) يعمل فى المجال حاليا او دارس له
- (متلقى خبرة) خبرة فى المجال سواء بصناعة الافلام او بالنقد و التحليل
خلينا نشوف صفات و طبيعة كل نوع منهم...
اولا: المتلقى العادى
مشاهد عادى جدا، مش دارس ولا ملم بالجوانب الفنية المختلفة، بيتفرج بشكل سطحى جدا..مش هيعذرك فى اى حاجة لو القصة طلعت وحشة مثلا، او التمثيل مش ولا بد، غالبا ماعندوش السينس الفنى، الى هو انا بتفرج عشان اتسلى، اشوف قصة كويسة و اداء كويس و خلاص، لو مالقتش الحاجتين دول، ههاجم الفيلم و اعتبره فيلم سئ جدا و مضيعة للوقت.
الحقيقة ان النوع ده مفيد جدا فى حالة انك عايز تعرف الى اى مدى بتقدر توصل القصة بشكل سلس و بسيط للمشاهدين العاديين، و قدرتك على اختيار الممثلين المناسبين لكل دور.
لكن لازم تاخد بالك وانت بتسمع رأيهم، انهم بياخدوا ٢٠ % بس من جماليات الفيلم.
ثانيا: المتلقى المتطور
ده مشاهد مخضرم، بيشوف و بيتفرج كتير، متطور عن النوع السابق، عارف يعنى ايه قصة قوية وتمثيل متماسك وكادرات فنية..
ده رأيه مهم، لأنه بيجمع بين الشخص الفاهم للسنيما و بين المشاهد البيسط الى بيدور على قصة حلوة و تمثيل كويس و فيلم ممتع..بس مشكلته ان رأيه ممكن يتأثر بآراء الى حواليه فى الفيلم.
بالنسبالى دول أفضل ناس اعرف رأيهم و باخده بعين الاعتبار فعلا.
ثالثا: متلقى زميل
ده بيكون مثلا صانع افلام مستقل، او له علاقة بالمجال بشكل او بآخر، و ده له فوايده و له عيوبه.
فوايده انه بيبقى فاهم كل المجهود والصعوبات الى ممكن تكون واجهتك وانت بتعمل كل مشهد، و بيبقى مقدر كل الجوانب الجمالية فى الفيلم، سواء ألوان، كدرات، موسيقى، تمثيل، و طبعا قصة..
مشكلته انه ممكن تكون آراءه محبطة احيانا، لأنه زى ما بيشوف شغلك، بيشوف شغل كتير غيرك، و مستويات اعلى بكتير، ممكن يبدأ المقارنة او تكون standers التقييم عنده عليت من كتر الى بيشوفه مع عدم مراعاة اختلاف الامكانيات والفرص.
رابعا: متلقى خبرة
شغال بالفعل فى المجال بقاله فترة كبيرة, و شاف افلام مستقلة كتير, له وجه نظر مخلوطة بالخبرة, واقعى ومابيجملش الحقائق.
ده أكتر واحد تستفيد منه فى انك تعرف نفاط الضعف فى الفيلم, ماتتوقعش انه يقولك على حاجة فى الفيلم حلوة, و ده اىل انت عايزه, انك تعرف ايه المشاكل الى عندك بشكل منطقى و حيادى, انت المستفيد فى الآخر...اهتم برأيه جدا.
فى النهاية انت لازم تسمع لكل الناس, بس لازم بردو يكون عندك القدرة على معرفة الرأى المفيد و البناء, من الرأى الـ"أى كلام"، و مش معنى ان حد قالك نقاط الضعف فى الفيلم انه منفسن او مش فاهم, لأ وارد جدا يكون عنده حق.
لازم تعرف نقادك من انهى نوع, و رأيهم مبنى على اى اساس, وتاخد منه المفيد, و تيبك من الباقى, لأن ممكن الآراء الى" مش على هواك" من الأشخاص الغلط تحبطك..زى ما بردو الآراء الإيجابية من الأشخاص الغير مختصين تخليك مغرور, او على الأقل مش مدرك لجوانب الضعف فى فيلمك الى لازم تصلحها و تتجنبها فى كل شغلك الى جى.
انت بتتقبل رأى الناس فى اعمالك ازاى؟